浣腸水療，為大腸做運動！

Book好左時間，深呼吸一下，就進行左我第一次的浣腸水療。 去到詩琳，首先就入左間房仔度填左少少資料同了解下個療程。

對過程有左了解之後，浣腸師就帶左我入房介紹下D設施。首先就係一張生仔床，浣腸水療就係訓起上面進行。 經過5重過濾雙頭式逆滲RO/KDF濾水系統的純水就係由呢度接駁到水療床的幼管。 就係將呢支幼管親自放到肛門不超過2吋的位置。(Elva話你想放入D都唔得，因為係會頂住架！) 呢支幼管每次都係係你面前拆開，仲係用完即棄的。純水帶出黎的排泄物就係經白色個個洞流走， 流到透明管俾你睇。 同場仲有電視俾你解悶，同暖包俾你舒緩肚痛。

因為係第一次做的關係，一開始浣腸師只係俾左一支水等條腸適應下， 千奇百趣的事就係呢度發生喇！浣腸師問我feel唔feel到有水入，我完全feel唔到，跟住佢睇一睇個樽，真係入唔到水喎…點解呢？原來係我有太多氣係條腸度，搞到頂住左。浣腸師幫我推左一陣肚，d氣就谷返入個樽度，足足有1/5個樽咁多…

終於都入到水喇，不過入左一樽水我條腸都無咩反應，再入多樽，個肚終於都攪攪地喇…浣腸師見我都識排返D水出黎就出左去拎左個暖包俾我，再話我知排出黎一粒粒黑色個D就係大腸壁的污穢野，然後叫我自己再試下。隔左一陣，浣腸師再入黎睇睇情況，佢叫我試下忍一陣先再排，咁樣可以令到再高一D的宿便掂到水而令到佢地容易D排出。再努力多一陣，35分鐘左右的療程就完成喇！

不過仲未可以離開張床住，因為大腸入面仲有水係未排出黎，要排埋出黎先得。坐多一陣，排埋D水出黎，再用個花洒沖乾淨個pat pat就可以離開水療房，出返大廳食益生菌同寶礦力。

完左水療，一落床個一下我自己就覺得好舒服，好似塞住個門口既野終於都清走左的感覺，仲好似輕左咁添。返到屋企，媽媽話個肚腩細左，不過我又唔係好覺喎…

因為連續做係會有最好的效果，我又唔敢等太耐，於事乎，我隔左一日就再去過。第二次一開始就已經係不停咁入水，自己努力一陣之後浣腸師就會入黎睇睇情況，再幫你推肚，令大腸郁多D。最厲害既係，第二次比第一次排出更多癈物。完左之後個種一身輕的感覺就無第一次咁勁。兩次浣腸之後過左兩日，我都仲未有便便，不過每朝起身都有久違了的便意，亦都feel到條腸gelegulu。雖然無野排到出黎，但我都會去馬桶坐一陣，培養下情緒，希望可以養成良好的排便習慣。

我相信有幾個問題好多人都想知，睇下我又解唔解答到你啦！

Q︰究竟放支管入肛門難唔難、痛唔痛呢？

A︰因為佢有花士令係上面，所以都唔難入既。

Q︰條管會唔會排排下排埋出黎架？

A︰係唔會架！

Q︰過程又臭唔臭呢？(我媽媽最concern的事…)

A︰係一D都唔臭架！間房仲有香薰癖味添！

Q︰會唔會好攪肚、好辛苦架？

A︰呢樣就因人而異。我就有攪肚，由其是忍水個時最辛苦，不過排哂出黎之後就唔痛。佢地有暖包俾你舒緩一下，浣腸師仲會教你點樣按摩個肚令佢無咁痛的。

Q︰做完之後又會唔會hard sell架？

A︰人地打開門口做生意，Sell就當然會有啦。不過如果你唔想要，佢唔會死lur你唔俾你走。

Q︰咁洗腸又會唔會做成依賴呢？

A︰浣腸水療中心方面就話唔會，佢地認為浣腸水療等同幫助大腸進行運動，使大腸機能回復正常。持續治療更可強化大腸功能。西醫就認為係無根據，而港大就做有做呢方面的研究。

我自己亦都擔心呢個問題，十二次水療為一個療程，頭兩次要連續兩日做，之後四次要一星期做兩次，然後個六次要每星期做一次。感覺上都好似做得好密咁…

我得個廿幾歲人，便秘問題就跟足我廿幾年(媽媽話我由牙牙仔已經唔係成日有便便)，平均一星期得一兩次排便，須然情況唔算係嚴重，但係個種苦況就唔係人人明白，希望浣腸水療真係幫到我解決呢個問題。